ધ ગ્રેટ વર્લ્ડ, અમદાવાદ
ગુજરાતી નાટ્યજગત અને કલા જગત માટે આજે એક શોકતુર દિવસ છે. કલાકાર પરિવારની કલગીમાંથી જાણે એક અમૂલ્ય પીંછું ખરી ગયું હોય તેમ, જાણીતા અભિનેતા અને રંગમંચના જીવ ભીમ વાકાણીએ દુનિયામાંથી વિદાય લીધી છે. તેમના નિધનના સમાચારથી કલાપ્રેમીઓમાં ગમગીની વ્યાપી ગઈ છે.
શિક્ષણ અને કલાનો અનોખો સમન્વય
ભીમ વાકાણી મૂળભૂત રીતે વ્યવસાયે શિક્ષક હતા, પરંતુ તેમની નસોમાં કલા વહેતી હતી. ચિત્રકામ તેમનો પ્રિય વિષય હતો અને કદાચ એટલે જ તેમના અભિનયમાં પણ એક ખાસ પ્રકારની લય અને રેખાઓ જોવા મળતી. તેમણે ‘વાકાણી થિયેટર્સ’ દ્વારા અનેક યાદગાર નાટકો આપ્યા અને ગુજરાતી રંગમંચને જીવંત રાખવામાં મોટું યોગદાન આપ્યું.
ટેલિવિઝન અને બોલિવૂડમાં પ્રદાન
તેમની ઓળખ માત્ર નાટકો પૂરતી મર્યાદિત નહોતી. તેમણે હિન્દી સિનેમાની બ્લોકબસ્ટર ફિલ્મો જેવી કે ‘લગાન’ અને ‘સ્વદેશ’ માં પણ પોતાની અભિનય પ્રતિભાના દર્શન કરાવ્યા હતા. આ ઉપરાંત, લોકપ્રિય સિરિયલ ‘તારક મહેતા કા ઉલ્ટા ચશ્મા’ માં પણ તેઓ જોવા મળ્યા હતા.
”પોતાના સંતાનો મયુર વાકાણી (સુંદલાલ) અને દિશા વાકાણી (દયાબેન) સાથે એક જ ફ્રેમમાં અભિનય કરતી વખતે તેઓ હંમેશા વિશેષ ગર્વ અને આનંદની લાગણી અનુભવતા હતા.”
સંતાનોએ ગુમાવી પિતાની છત્રછાયા
ભીમ વાકાણીના નિધનથી તેમના પુત્ર મયુર વાકાણી અને પુત્રી દિશા વાકાણીએ પિતાની પ્રેમાળ છાયા ગુમાવી છે. પિતાના પગલે ચાલીને જ બંને સંતાનોએ આજે અભિનય ક્ષેત્રે ઊંચું નામ કમાવ્યું છે.
ગુજરાતી તખ્તાના આ દિગ્ગજ કલાકારની દિવ્ય ચેતનાને શત્ શત્ વંદન. ભગવાન તેમના આત્માને શાંતિ આપે અને વાકાણી પરિવારને આ દુઃખ સહન કરવાની શક્તિ આપે એવી પ્રાર્થના.
