ધ ગ્રેટ વર્લ્ડ, અમદાવાદ
જામનગરના કુખ્યાત અને ગુજસીટોક એક્ટ હેઠળ જેલમાં બંધ ગેંગસ્ટર જયસુખ રાણપરિયા ઉર્ફે જયેશ પટેલની ૧૪ વર્ષની સગીર પુત્રીને ગુજરાત હાઈકોર્ટે કાયદાકીય નોટિસ પાઠવતા કાનૂની વર્તુળોમાં ભારે ચર્ચા જાગી છે. ગુજરાતી જાગરણના અહેવાલ પ્રમાણે, આ મામલાની વિગત એવી છે કે સગીરાએ સોશિયલ મીડિયા અને પત્રિકાઓના માધ્યમથી તેના પિતા વિરૂદ્ધ કોર્ટમાં સાક્ષી આપનારા અને કાનૂની પ્રક્રિયામાં મદદ કરનારા ગુપ્ત સાક્ષીઓના નામો સરેઆમ જાહેર કરી દીધા હતા. કાયદા મુજબ ગુજસીટોક જેવા ગંભીર ગુનાઓમાં સાક્ષીઓની સુરક્ષા માટે તેમના નામ ગુપ્ત રાખવાના હોય છે, પરંતુ આ રીતે નામો જાહેર થતાં સાક્ષીઓના જીવ પર જોખમ ઊભું થયું હોવાની રજૂઆત કોર્ટ સમક્ષ કરવામાં આવી હતી.
અદાલતે આ બાબતને અત્યંત ગંભીર ગણીને સગીરા સામે કાયદાના દાયરામાં રહીને કારણદર્શક નોટિસ જાહેર કરી છે. સુનાવણી દરમિયાન સરકારી વકીલે દલીલ કરી હતી કે ભલે આરોપીની પુત્રી સગીર વયની છે, પરંતુ આ કૃત્ય પાછળ જેલની અંદરથી અથવા બહારથી કોઈ ચોક્કસ ગેંગના સભ્યોનું ભેજું કામ કરી રહ્યું છે જે સાક્ષીઓને ડરાવવા અને ધમકાવવાનો પ્રયાસ છે. હાઈકોર્ટે સાક્ષીઓની સુરક્ષા તાત્કાલિક વધારવા માટે સ્થાનિક પોલીસ તંત્રને આદેશ આપ્યા છે અને સગીરાના વાલીઓને આગામી સુનાવણીમાં હાજર રહીને સ્પષ્ટતા કરવા જણાવ્યું છે. આ કેસના કારણે ગુજસીટોક કાયદા હેઠળ સાક્ષીઓની સુરક્ષાના કડક અમલીકરણ પર ફરી એકવાર ભાર મુકાયો છે.