ઘોઘા-અવાણીયા પાસે ઇકો કાર અને બાઈક વચ્ચે અકસ્માત: બે વ્યક્તિઓ ગંભીર રીતે ઘાયલ

​ઘટનાસ્થળે લોકોના ટોળા ઉમટ્યા અને પોલીસે તપાસ શરૂ કરી
​ભાવનગરના ઘોઘા નજીક અવાણીયા પાસે એક ભયંકર અકસ્માત સર્જાયો હોવાની ઘટના સામે આવી છે. 8 મે 2026ના રોજ શુક્રવારે રાત્રે આઠ વાગ્યાના સુમારે ઘોઘા-અવાણીયા રોડ પર એક ઇકો કાર અને ટુ-વ્હીલર બાઈક વચ્ચે સામસામે જોરદાર ટક્કર થઈ હતી. આ અકસ્માત એટલો ભયંકર હતો કે બાઈક પર સવાર બે વ્યક્તિઓને શરીરે ગંભીર ઈજાઓ પહોંચી હતી. અકસ્માતને પગલે આસપાસના લોકો તાત્કાલિક ઘટનાસ્થળે દોડી આવ્યા હતા અને ઇજાગ્રસ્તોને મદદ કરવાના પ્રયાસો શરૂ કર્યા હતા.
​અકસ્માતની જાણ થતા જ 108 એમ્બ્યુલન્સ સેવાને જાણ કરવામાં આવી હતી, જેના દ્વારા બંને ઇજાગ્રસ્તોને વધુ સારવાર માટે તાત્કાલિક ભાવનગરની હોસ્પિટલ ખાતે ખસેડવામાં આવ્યા છે. આ બનાવ અંગે ઘોઘા પોલીસને જાણ કરવામાં આવતા પોલીસ કાફલો પણ તુરંત ઘટનાસ્થળે પહોંચી ગયો હતો અને ટ્રાફિક ક્લિયર કરાવી કાયદેસરની કાર્યવાહી હાથ ધરી હતી. અકસ્માતને જોવા માટે મોટી સંખ્યામાં લોકોના ટોળા એકત્રિત થઈ ગયા હતા. હાલમાં પોલીસ આ મામલે વધુ તપાસ કરી રહી છે કે અકસ્માત કયા કારણોસર સર્જાયો હતો.