ચીનનું સ્પેસ મિશન ‘શેનઝોઉ-૨૨’ સુપર સક્સેસફુલ: ત્રણ અવકાશયાત્રીઓ પૃથ્વી પર સુરક્ષિત પાછા ફર્યા

ધ ગ્રેટ વર્લ્ડ, બેઇજિંગ

— ચીનની અવકાશ સંશોધન ક્ષેત્રની મહત્વાકાંક્ષાને આજે એક બહુ મોટી અને ઐતિહાસિક સફળતા મળી છે. ચીનનું અત્યાધુનિક સ્પેસક્રાફ્ટ ‘શેનઝોઉ-૨૨’ (Shenzhou-22) તેના નિર્ધારિત સમયપત્રક મુજબ ત્રણ ચાઈનીઝ અંતરિક્ષ યાત્રીઓ – ઝાંગ લુ, વુ ફેઈ અને ઝાંગ હોંગઝાંગને સુરક્ષિત રીતે લઈને પૃથ્વી પર પાછું ફર્યું છે. આ સ્પેસક્રાફ્ટ ઉત્તરી ચીનમાં આવેલા ઇનર મંગોલિયા સ્વાયત્ત પ્રદેશના પૂર્વનિર્ધારિત લેન્ડિંગ સાઇટ પર સફળતાપૂર્વક ઉતરી આવ્યું હતું. ચાઈનીઝ સ્પેસ એજન્સીના વરિષ્ઠ અધિકારીઓએ આ મિશનને સો ટકા સફળ જાહેર કર્યું છે. સ્પેસક્રાફ્ટના ઉતરાણની સાથે જ ત્યાં હાજર વૈજ્ઞાનિકો અને એન્જિનિયરોની ટીમે હર્ષોલ્લાસ સાથે આ વિજયને વધાવી લીધો હતો. આ ત્રણેય અવકાશયાત્રીઓ ચીનના પોતાના સ્પેસ સ્ટેશન ‘ટિઆન્ગોંગ’ (Tiangong Space Station) પર પાછલા કેટલાક મહિનાઓથી રહીને વિજ્ઞાન, તબીબી અને ઝીરો-ગ્રેવિટી ટેક્નોલોજી સંબંધિત અનેક મહત્વપૂર્ણ પ્રયોગો કરી રહ્યા હતા. મેડિકલ ટીમે પ્રાથમિક તપાસ બાદ જણાવ્યું છે કે ત્રણેય અંતરિક્ષ યાત્રીઓની તબિયત સંપૂર્ણપણે સ્વસ્થ છે અને તેઓ પૃથ્વીના વાતાવરણ સાથે અનુકૂલન સાધી રહ્યા છે. આ મિશનની સફળતાથી ચીને સ્પેસ સેક્ટરમાં અમેરિકાની નાસા (NASA) ને સીધી ટક્કર આપીને પોતાની વૈજ્ઞાનિક ક્ષમતાનું પ્રદર્શન કર્યું છે, જે આગામી સમયમાં ચંદ્ર અને મંગળ પર માનવ મિશન મોકલવાના ચીનના ઈરાદાઓને વધુ મજબૂત બનાવશે.