સમસ્ત બ્રહ્મસમાજ યુવા પંચ ટ્રસ્ટ દ્વારા શરૂ કરાયેલી પહેલથી શિક્ષણ અને ગૌસેવાને પણ મળશે સહયોગ
ધ ગ્રેટ વર્લ્ડ, પોરબંદર
દિવાળીના તહેવારને ધ્યાનમાં રાખીને પોરબંદરમાં સમસ્ત બ્રહ્મસમાજ યુવા પંચ ટ્રસ્ટ દ્વારા ઓર્ગેનિક કેસર કેરી વિતરણનું વિશેષ આયોજન કરવામાં આવ્યું છે. ટ્રસ્ટ દ્વારા ગીર વિસ્તારના ખોરાસા સ્થિત ભૂતનાથ મંદિર આશ્રમ ગૌશાળામાં કુદરતી રીતે તૈયાર થતી ઓર્ગેનિક કેસર કેરીનું વિતરણ કરવામાં આવશે. આ પહેલને લઈને શહેરમાં કેરીપ્રેમીઓ અને સામાજિક વર્ગોમાં રસ જોવા મળી રહ્યો છે.
ટ્રસ્ટ દ્વારા જાહેર કરાયેલી વિગતો મુજબ એક બોક્સમાં અંદાજિત ૧૦ કિલો કેસર કેરી આપવામાં આવશે, જ્યારે પ્રતિ બોક્સ કિંમત રૂ. ૧૪૦૦ નક્કી કરવામાં આવી છે. આયોજકોના જણાવ્યા અનુસાર સંપૂર્ણ રીતે ઓર્ગેનિક પદ્ધતિથી તૈયાર થતી આ કેરીમાં રાસાયણિક પ્રક્રિયાનો ઉપયોગ કરવામાં આવતો નથી, જેના કારણે ગ્રાહકોને કુદરતી સ્વાદ અને ગુણવત્તાવાળી કેરી ઉપલબ્ધ થશે.
પોરબંદર શહેરમાં ગ્રાહકોને હોમ ડિલિવરીની સુવિધા પણ ઉપલબ્ધ કરાવવામાં આવશે. જ્યારે બહારગામના ઓર્ડર માટે અલગથી ચાર્જ લેવામાં આવશે તેવી માહિતી ટ્રસ્ટ દ્વારા આપવામાં આવી છે. આયોજકોએ લોકોને વહેલી તકે ઓર્ડર નોંધાવવા અપીલ કરી છે જેથી સમયસર વિતરણની વ્યવસ્થા સરળતાથી થઈ શકે.
ઓર્ડર નોંધાવવા માટે ગિરીશભાઈ વ્યાસ અને પ્રકાશભાઈનો સંપર્ક કરવા જણાવાયું છે. ટ્રસ્ટ સાથે સંકળાયેલા આગેવાનોના જણાવ્યા મુજબ આ સમગ્ર પ્રોજેક્ટ માત્ર ફળ વિતરણ પૂરતો મર્યાદિત નથી, પરંતુ તેના માધ્યમથી ગૌસેવા અને શિક્ષણ ક્ષેત્રે પણ સહયોગ પહોંચાડવાનો પ્રયાસ કરવામાં આવી રહ્યો છે.
આ પહેલમાંથી મળનારી આવકનો ઉપયોગ શૈક્ષણિક સંકુલ, પરશુરામ ધામ અને વનાશ્રિત આર્થિક લાભાર્થે કરવામાં આવશે. સમાજલક્ષી પ્રવૃત્તિ સાથે સ્થાનિક અને ઓર્ગેનિક કૃષિ ઉત્પાદનને પ્રોત્સાહન આપતી આ યોજના લોકોમાં સારો પ્રતિસાદ મેળવી રહી હોવાનું આયોજકો દ્વારા જણાવાયું છે.
પર્યાવરણ અને આરોગ્ય પ્રત્યે વધતી જાગૃતિ વચ્ચે ઓર્ગેનિક ઉત્પાદનો તરફ લોકોનું આકર્ષણ સતત વધી રહ્યું છે. ત્યારે પોરબંદરમાં શરૂ કરાયેલ આ પ્રકારનું આયોજન માત્ર વ્યાપારિક પ્રવૃત્તિ નહીં પરંતુ સામાજિક સહયોગ અને સ્વસ્થ જીવનશૈલી તરફનો પ્રયાસ માનવામાં આવી રહ્યો છે.
