ધ ગ્રેટ વર્લ્ડ, દુબઈ
હોર્મુઝની સામુદ્રધુનીમાં અમેરિકા અને ઈરાન વચ્ચે વધતા જતા સૈન્ય તણાવની સીધી અસર હવે સામાન્ય જનજીવન પર પડવા લાગી છે. દુબઈ પ્રશાસને સાવચેતીના પગલા રૂપે આજથી તમામ શાળાઓ અને શૈક્ષણિક સંસ્થાઓને ઓનલાઈન મોડ પર ખસેડવાનો આદેશ આપ્યો છે. આ નિર્ણય પાછળનું મુખ્ય કારણ સંભવિત મિસાઈલ હુમલા અને ડ્રોન હુમલાઓનો ખતરો હોવાનું માનવામાં આવે છે. સત્તાવાળાઓએ વાલીઓને ખાસ સૂચના આપી છે કે બાળકોને શાળાઓએ મોકલવાને બદલે ઘરેથી જ અભ્યાસ કરાવવામાં આવે અને કટોકટીના સમય માટે જરૂરી ખાદ્યસામગ્રી અને દવાઓનો સંગ્રહ રાખવામાં આવે.
દુબઈમાં રહેતા હજારો ભારતીય પરિવારોમાં પણ આ સ્થિતિને લઈને ચિંતા જોવા મળી રહી છે. જોકે, યુએઈ સરકાર દ્વારા લોકોને આશ્વાસન આપવામાં આવ્યું છે કે દેશની સુરક્ષા વ્યવસ્થા અત્યંત મજબૂત છે અને હવાઈ સંરક્ષણ પ્રણાલી (Air Defense System) સતત કાર્યરત છે. તેમ છતાં, સરહદી વિસ્તારોમાં વધતી હિલચાલ અને તાજેતરમાં ફુજૈરાહ તેલ સુવિધા પર થયેલા હુમલા બાદ કોઈ પણ પ્રકારનું જોખમ લેવા માંગતી નથી. દુબઈના આંતરરાષ્ટ્રીય એરપોર્ટ પર પણ ફ્લાઈટના શિડ્યુલમાં ફેરફાર થવાની શક્યતા છે. વૈશ્વિક સમુદાય પણ મધ્ય પૂર્વની આ પરિસ્થિતિ પર બારીકાઈથી નજર રાખી રહ્યો છે, કારણ કે આ પ્રદેશમાં અસ્થિરતા સમગ્ર વિશ્વના આર્થિક હિતોને અસર કરી શકે છે.
