ધ ગ્રેટ વર્લ્ડ, બેઇજિંગ
અમેરિકી રાષ્ટ્રપતિ ડોનાલ્ડ ટ્રમ્પની તાજેતરની ચીન મુલાકાતના થોડા જ દિવસો બાદ રશિયાના રાષ્ટ્રપતિ વ્લાદિમીર પુતિન બે દિવસીય સત્તાવાર અને અત્યંત મહત્વપૂર્ણ મુલાકાતે ચીનની રાજધાની બેઇજિંગ પહોંચ્યા છે. રોઇટર્સ ન્યૂઝ એજન્સીના વૈશ્વિક અહેવાલ મુજબ, વૈશ્વિક ભૌગોલિક રાજકારણની દ્રષ્ટિએ આ મુલાકાતને ખૂબ જ નિર્ણાયક માનવામાં આવી રહી છે. ગ્રેટ હોલ ઓફ ધ પીપલ ખાતે ચીનના રાષ્ટ્રપતિ શિ જિનપિંગે રશિયન રાષ્ટ્રપતિનું ઉષ્માભર્યું સ્વાગત કર્યું હતું. બંને નેતાઓએ એક ખાસ ગોઠવાયેલી ‘ટી ડિપ્લોમેસી’ એટલે કે ચા પર ચર્ચાના સત્ર અંતર્ગત કોઈ પણ મધ્યસ્થી વગર સીધી અને ગુપ્ત વાટાઘાટો કરી હતી.
આ બેઠકમાં ખાસ કરીને પશ્ચિમી દેશો અને અમેરિકા દ્વારા રશિયા અને ચીન પર લાદવામાં આવેલા આર્થિક પ્રતિબંધોનો સામનો કરવા માટે સંયુક્ત વ્યાપારિક સંગઠન બનાવવાની વ્યૂહરચના પર ચર્ચા થઈ હતી. આ ઉપરાંત યુક્રેન સંકટ અને મધ્યપૂર્વમાં ચાલી રહેલા યુદ્ધની વૈશ્વિક અસરો અંગે બંને દેશોએ પરસ્પર સહયોગ વધારવાનો સંકલ્પ કર્યો હતો. રશિયા તરફથી ચીનને સસ્તા દરે ઓઈલ અને ગેસનો પુરવઠો ચાલુ રાખવા તેમજ ચીન તરફથી રશિયાને અદભુત ટેકનોલોજીકલ સહાય આપવાના કરારોને આખરી ઓપ અપાયો હતો. વૈશ્વિક વિશ્લેષકોના મતે પુતિન અને જિનપિંગની આ જુગલબંધી અમેરિકા અને તેના સાથી દેશો માટે એક મોટો રાજદ્વારી પડકાર સાબિત થઈ શકે છે.