સીએટલ ખાતે ભારતીય કોન્સ્યુલેટ દ્વારા આયોજિત સ્વતંત્રતા દિવસની ઉજવણીમાં રાષ્ટ્રધ્વજ ક્વિઝમાં મેળવી ભવ્ય સિદ્ધિ
ધ ગ્રેટ વર્લ્ડ ભાવનગર
અમેરિકાના સીએટલ શહેરમાં ભારતના ૮૦મા સ્વતંત્રતા દિવસની ભવ્ય ઉજવણી કરવામાં આવી હતી. સીએટલ સ્થિત કોન્સ્યુલેટ જનરલ ઓફ ઇન્ડિયા દ્વારા આયોજિત આ વિશેષ કાર્યક્રમમાં દેશભક્તિનો માહોલ જોવા મળ્યો હતો. આ ઉજવણીના ભાગરૂપે વિવિધ કાર્યક્રમોનું આયોજન કરવામાં આવ્યું હતું, જેમાં ‘રાષ્ટ્રધ્વજ ક્વિઝ’ સ્પર્ધા ખાસ આકર્ષણનું કેન્દ્ર બની હતી. આ સ્પર્ધામાં ગુજરાતના ભાવનગરના વતની સિદ્ધાર્થ શેઠે પોતાની બૌદ્ધિક ક્ષમતાનો પરિચય આપીને વિજેતા બનવાનું ગૌરવ પ્રાપ્ત કર્યું હતું.
આ વિજય બાદ સિદ્ધાર્થ શેઠને સન્માનિત કરવા માટે એક વિશેષ સમારોહનું આયોજન કરવામાં આવ્યું હતું. ભારતીય ક્રિકેટ જગતના દિગ્ગજ ખેલાડી સુનિલ ગાવસ્કરના હસ્તે સિદ્ધાર્થ શેઠનું સન્માન કરવામાં આવ્યું હતું. એક વૈશ્વિક મંચ પર ક્રિકેટના આ દિગ્ગજ ખેલાડીના હાથે સન્માન મેળવવું તે સિદ્ધાર્થ શેઠ માટે જીવનનો યાદગાર પ્રસંગ બની રહ્યો હતો. કાર્યક્રમમાં ઉપસ્થિત તમામ લોકોએ સિદ્ધાર્થ શેઠની આ સિદ્ધિને ખૂબ જ ઉત્સાહથી વધાવી લીધી હતી.
આ ગૌરવપૂર્ણ પ્રસંગે સીએટલના કોન્સ્યુલ જનરલ ઓફ ઇન્ડિયા પ્રકાશ ગુપ્તા પણ ખાસ ઉપસ્થિત રહ્યા હતા. આ ઉપરાંત સ્થાનિક મેયર, સાંસદ, વિવિધ ક્ષેત્રના અગ્રણીઓ, ઉદ્યોગપતિઓ અને ભારતીય સમુદાયના અનેક લોકોએ હાજરી આપી હતી. અમેરિકાની ધરતી પર આયોજિત આ કાર્યક્રમમાં ભારતીય સંસ્કૃતિ અને રાષ્ટ્રીય ગૌરવનું અનોખું પ્રદર્શન જોવા મળ્યું હતું. એક તરફ ક્રિકેટના દિગ્ગજ સુનિલ ગાવસ્કરની હાજરી અને બીજી તરફ ભાવનગરના યુવાનની આ સિદ્ધિએ કાર્યક્રમમાં ચાર ચાંદ લગાવી દીધા હતા. આ પ્રસંગે રાષ્ટ્રધ્વજ ક્વિઝમાં વિજેતા બનેલા સિદ્ધાર્થ શેઠનું સન્માન સમગ્ર ભારતીય સમુદાય માટે ગર્વની વાત બની હતી. કાર્યક્રમ દરમિયાન ભારત દેશની પ્રગતિ અને સિદ્ધિઓની પણ ચર્ચાઓ કરવામાં આવી હતી, જેણે ઉપસ્થિત દરેક ભારતીયના હૃદયમાં દેશપ્રેમની લાગણી જગાડી હતી.
