ધ ગ્રેટ વર્લ્ડ, જિનીવા
કોરોના મહામારીના ભયાનક અનુભવ બાદ હવે વિશ્વ આરોગ્ય સંસ્થા અને જુદા જુદા દેશોની સરકારો સંક્રમણ ફેલાવતા વાયરસને લઈને અત્યંત સાવધ બની ગઈ છે. આફ્રિકાના કેટલાક દેશોમાં જીવલેણ ‘ઇબોલા’ વાયરસના નવા કેસો સામે આવ્યા બાદ આંતરરાષ્ટ્રીય સ્તરે ગંભીર એલર્ટ જાહેર કરવામાં આવ્યું છે. ઇબોલા વાયરસ અતિશય ચેપી અને ઘાતક હોવાના કારણે તેના ફેલાવાને શરૂઆતના તબક્કામાં જ અટકાવવો અનિવાર્ય છે. વિવિધ દેશોની આરોગ્ય સમિતિઓ અને પ્રશાસન દ્વારા એરપોર્ટ અને બંદરો પર આફ્રિકન દેશોમાંથી આવતા મુસાફરોનું સખત સ્ક્રીનિંગ અને તબીબી પરીક્ષણ શરૂ કરી દેવામાં આવ્યું છે. આરોગ્ય નિષ્ણાતોએ ચેતવણી આપી છે કે જો આ વાયરસ અન્ય દેશોમાં ફેલાશે, તો તે લોકડાઉન જેવી ગંભીર સ્થિતિનું પુનરાવર્તન કરી શકે છે. સંભવિત જોખમોને પહોંચી વળવા માટે હોસ્પિટલોમાં ખાસ આઇસોલેશન વોર્ડ તૈયાર કરવામાં આવ્યા છે અને રસીકરણ તેમજ દવાઓનો જથ્થો ઉપલબ્ધ કરાવવાની કામગીરી યુદ્ધના ધોરણે ચાલી રહી છે જેથી કોઈ મોટી આફતથી બચી શકાય.