હરેશ જોષી ટીમાણા
ભાવનગર જિલ્લાના તળાજા તાલુકાના ટીમાણા ગામે આગામી સમયમાં માનવસેવાનું ઉમદા કાર્ય થવા જઈ રહ્યું છે. રણછોડદાસજી બાપુ ચેરીટેબલ હોસ્પિટલ રાજકોટ દ્વારા ગણેશ શાળા ટીમાણા ખાતે ૧૧ એપ્રિલ ૨૦૨૬ ને રવિવારના રોજ વિનામૂલ્યે નેત્ર નિદાન કેમ્પનું ભવ્ય આયોજન કરવામાં આવ્યું છે. આ કેમ્પમાં આંખના વિવિધ રોગોથી પીડાતા જરૂરિયાતમંદ દર્દીઓની તપાસ કરવામાં આવશે. ખાસ કરીને મોતિયાની તકલીફ ધરાવતા દર્દીઓ માટે આ કેમ્પ આશીર્વાદરૂપ સાબિત થશે, કારણ કે નિદાન બાદ ઓપરેશનની જરૂર હોય તેવા દર્દીઓને સંસ્થા દ્વારા ખાસ વાહન મારફતે રાજકોટ લઈ જવામાં આવશે. રાજકોટ સ્થિત હોસ્પિટલમાં આધુનિક ફેકો મશીન દ્વારા ટાંકા વગરનું ઓપરેશન કરી આપવામાં આવશે અને વિનામૂલ્યે નેત્રમણી પણ બેસાડવામાં આવશે.
આ સમગ્ર સેવાકીય પ્રવૃત્તિમાં દર્દીઓને રાજકોટ લઈ જવાથી માંડીને ઓપરેશન બાદ પરત ટીમાણા મૂકવા સુધીની તમામ સુવિધા હોસ્પિટલ તંત્ર દ્વારા મફત પૂરી પાડવામાં આવશે. આ નેત્રયજ્ઞનો લાભ લેવા ઈચ્છતા દર્દીઓએ પોતાની સાથે ઓળખના પુરાવા તરીકે [Aadhaar Redacted] ની નકલ સાથે લાવવી ફરજિયાત રહેશે. ગ્રામીણ વિસ્તારના લોકોમાં અંધત્વ નિવારણ અને આંખની સુરક્ષાના હેતુથી યોજાઈ રહેલા આ કેમ્પમાં મોટી સંખ્યામાં લોકો જોડાય અને સેવાનો લાભ લે તેવો અનુરોધ કરવામાં આવ્યો છે. ટાંકા વગરના અત્યાધુનિક ઓપરેશનની સુવિધા ઘરઆંગણે મળતી હોવાથી પંથકના દર્દીઓમાં આશાનું કિરણ જાગ્યું છે. સંસ્થા દ્વારા વર્ષોથી આ પ્રકારે લાખો દર્દીઓને નવી દ્રષ્ટિ આપવામાં આવી છે, જેના ભાગરૂપે હવે ટીમાણામાં આ વિશેષ કેમ્પ યોજાશે.
