નવા રતનપરમાં હાઈવોલ્ટેજ ડ્રામા: સરપંચ ગૌતમ બારૈયા એકતરફ બુલડોઝર ફેરવવા મક્કમ, બીજીતરફ સદસ્ય પ્રવીણ મકવાણાના કાનૂની દાવપેચ અને પંચરોજકામમા સરપંચની સહીથી નવો વળાંક: સરપંચે સેટીંગ કરી લીધું હોવાની ફરી એકવાર ચર્ચા

નવા રતનપરમાં હાઈવોલ્ટેજ ડ્રામા: સરપંચ ગૌતમ બારૈયા એકતરફ બુલડોઝર ફેરવવા મક્કમ, બીજીતરફ સદસ્ય પ્રવીણ મકવાણાના કાનૂની દાવપેચ અને પંચરોજકામમા સરપંચની સહીથી નવો વળાંક: સરપંચે સેટીંગ કરી લીધું હોવાની ફરી એકવાર ચર્ચા

ડિમોલિશન પૂર્વે જ વિસ્તરણ અધિકારી દવેની હાજરીમાં કરાયેલા પંચરોજકામે સરપંચને જ શંકાના દાયરામાં ઉભા કર્યા; મોલ પ્રવીણનો નહીં પણ તેના પિતાનો હોવાનો અને કોર્ટ કેસ પેન્ડિંગ હોવાનો ખુલાસો થતાં મામલો ગૂંચવાયો

ધ ગ્રેટ વર્લ્ડ, નવા રતનપર, ભાવનગર
નવા રતનપર ગામમાં પંચાયતની સરકારી જમીન પર ખડકાયેલા ગેરકાયદેસર શોપિંગ મોલને તોડી પાડવા માટે સરપંચ ગૌતમ બારૈયા આજે સવારે 11 વાગ્યે બુલડોઝર સાથે ડિમોલિશનની કાયદેસરની કાર્યવાહી કરવા માટે કટિબદ્ધ દેખાઈ રહ્યા છે. પરંતુ, આ હાઈપ્રોફાઈલ ડિમોલિશનની ગણતરીની મિનિટો પહેલાં જ આ આખોય મામલો ભારે કાનૂની અને વહીવટી ગૂંચવણમાં ફસાયો છે. એકતરફ સરપંચ દબાણ હટાવવા માટે આક્રમક મૂડમાં છે, તો બીજીતરફ ગ્રામ પંચાયતના સદસ્ય પ્રવીણ મકવાણાએ પોતાની સત્તા અને કાનૂની દાવપેચનો પૂર્જોશમાં ઉપયોગ કરીને તંત્ર સામે મોટો વળાંક લાવી દીધો છે. “ધ ગ્રેટ વર્લ્ડ” સમાચાર સંસ્થા અને ન્યૂઝ વેબસાઈટના હાથમાં લાગેલા સત્તાવાર દસ્તાવેજો (પંચરોજકામ) બાદ આખી ઘટનામાં સરપંચ ગૌતમ બારૈયા પોતે જ સવાલોના ઘેરાવમાં આવી ગયા છે. સરપંચે આ ડોક્યુમેન્ટ માં સહી કરીને પોતાની જ વિરુદ્ધમાં કુહાડો માર્યો હોવાની ચર્ચા ની સાથોસાથ સરપંચે આડકતરી રીતે સેટિંગ કરી લીધું હોવાની વાતને સમર્થન પ્રાપ્ત થઈ રહ્યું છે અને આ બાબતે ગામમાં પૂરજોશમાં ચર્ચાઓ ચાલી રહી છે.

વિસ્તરણ અધિકારીની મુલાકાત અને પંચરોજકામનો વિસ્ફોટ

મળતી વિગતો અનુસાર, ડિમોલિશનના બરાબર એક દિવસ અગાઉ એટલે કે ગઈકાલે તાલુકા પંચાયત કચેરી, ભાવનગરથી આવેલા વિસ્તરણ અધિકારી (વિકાસ) વી.બી. દવેની પ્રત્યક્ષ ઉપસ્થિતિમાં ઘટનાસ્થળ પર એક સત્તાવાર ‘પંચરોજકામ’ કરવામાં આવ્યું હતું. આ પંચરોજકામમાં જે હકીકતો સામે આવી છે, તે સરપંચ ગૌતમ બારૈયાના દાવાઓથી તદ્દન વિપરીત અને ચોંકાવનારી છે.
પંચરોજકામની વિગતો અનુસાર, નવા રતનપર ગામે પાદર વિસ્તારમાં હોળી ટીમ્બાની બાજુમાં, મામાએ જવાના રસ્તાની બાજુમાં, કૃષ્ણપરા વિસ્તારમાં જવાના રોડ પર સ્લેબવાળી પાકી દુકાનો (૪ શટરવાળી જગ્યા) આવેલી છે. આ જગ્યા પર ‘મકવાણા પાન’ નામે ચાલતી દુકાન પર પ્રવીણ મકવાણાના ભાઈ મુન્નાભાઈ હિરાભાઈ મકવાણા હાજર મળી આવ્યા હતા. તેમની પૂછપરછ કરતાં પંચો સમક્ષ સત્તાવાર નોંધાયું છે કે, આ દુકાનો કે શોપિંગ સેન્ટરનું બાંધકામ વર્તમાન પંચાયત સદસ્ય પ્રવીણભાઈ હિરાભાઈ મકવાણાએ કર્યું જ નથી! આ દબાણ તેમના પિતા હિરાભાઈ જીવણભાઈ મકવાણાના સમયનું છે અને તેમના દ્વારા જ કરવામાં આવ્યું છે.

સહી-સિક્કા સરપંચના અને દાવો ડિમોલિશનનો: મોટો પ્રશ્નાર્થ

આ સમગ્ર મામલામાં સૌથી મોટો વહીવટી અને એનાલિટિકલ પ્રશ્ન એ ઊભો થાય છે કે, જે પંચરોજકામમાં આ દબાણ પ્રવીણ મકવાણાનું નહીં પરંતુ તેના પિતાનું હોવાનું સ્પષ્ટ લખાયું છે, તે પંચરોજકામના બીજા પાના પર નવા રતનપર ગ્રામ પંચાયતના સરપંચ અને તલાટી-કમ-મંત્રીના સત્તાવાર સહી-સિક્કા બોલે છે!
એક એનાલિટિકલ દ્રષ્ટિકોણથી જોઈએ તો, જો સરપંચ ગૌતમ બારૈયા પોતે આ પંચરોજકામમાં સહી કરીને સ્વીકારી રહ્યા છે કે દબાણ પ્રવીણનું નથી, તો પછી તેઓ કયા કાનૂની આધારે આજે સવારે 11 વાગ્યે પ્રવીણ મકવાણાના નામે બુલડોઝર ફેરવવાની કાયદેસરની તૈયારીઓ કરી રહ્યા છે? આ દસ્તાવેજ સામે આવ્યા બાદ ગામમાં એવી પ્રબળ ચર્ચા જાગી છે કે, સરપંચ આખેઆખું પંચરોજકામ જનતા અને મીડિયાથી છુપાવવા માંગતા હતા, જેથી તેમનો ડિમોલિશનનો એજન્ડા સફળ થઈ શકે. સહી કરી દીધા બાદ પણ સરપંચ દ્વારા આ દસ્તાવેજને નજરઅંદાજ કરવાનો પ્રયાસ તંત્રની બેધારી નીતિ છતી કરે છે.

અદાલતમાં કેસ પેન્ડિંગ: પ્રવીણ મકવાણાના કાનૂની દાવપેચ

બીજી તરફ, પંચાયત સદસ્ય પ્રવીણ મકવાણાએ પણ પોતાના પદ અને કાનૂની અધિકારોનો ઉપયોગ કરીને સરપંચને કાયદાના સકંજામાં લેવાની પૂરજોશ તૈયારી કરી લીધી છે. પંચરોજકામમાં સત્તાવાર ઉલ્લેખ કરાયો છે કે, સવાલવાળી જગ્યા પરનું દબાણ કાયમી કરવા માટે નામદાર કોર્ટમાં દીવાની કેસ નં. ૨૭૦/૨૦૨૬ થી કેસ ફાઇલ કરી દેવામાં આવ્યો છે અને આ મામલો હાલ કોર્ટ સમક્ષ પેન્ડિંગ (વિચારાધીન) છે.
કાયદાકીય નિયમો મુજબ, જ્યારે કોઈ મિલકત કે જમીનનો વિવાદ નામદાર કોર્ટ સમક્ષ પેન્ડિંગ હોય, ત્યારે સ્થાનિક વહીવટીતંત્ર કે ગ્રામ પંચાયત તેના પર સીધું બુલડોઝર ફેરવી શકે નહીં. આમ, પ્રવીણ મકવાણાએ કોર્ટ કેસ અને વિસ્તરણ અધિકારીના પંચરોજકામનો મજબૂત ઢાલ તરીકે ઉપયોગ કરીને સરપંચ ગૌતમ બારૈયાની ડિમોલિશનની ગતિવિધિઓ પર બ્રેક મારવાનો મજબૂત કાનૂની દાવ ખેલ્યો છે.

નોટિસની ટેકનિકલ ખામી અને સત્તાનો દુરુપયોગ?

ગ્રામ પંચાયત દ્વારા ગુજરાત પંચાયત અધિનિયમ ૧૯૯૩ની કલમ ૧૦૫ હેઠળ પ્રવીણભાઈ હિરાભાઈ મકવાણાને પ્રથમ નોટિસ તા. ૨૭/૦૧/૨૦૨૬ અને બીજી નોટિસ તા. ૦૬/૦૨/૨૦૨૬ ના રોજ આપવામાં આવી હતી. પરંતુ હવે જ્યારે સરકારી તપાસમાં જ સાબિત થયું છે કે આ જગ્યા પ્રવીણ મકવાણાના પિતાના નામે છે અને મોલ પણ તેમણે બનાવ્યો છે, ત્યારે પ્રવીણના નામે ઈસ્યુ થયેલી નોટિસો જ કાયદાકીય રીતે રદબાતલ ઠરે તેવી સ્થિતિ સર્જાઈ છે.
હવે જોવાનું એ રહેશે કે, આજે સવારે 11 વાગ્યે સરપંચ ગૌતમ બારૈયા તમામ કાનૂની દાવપેચ અને કોર્ટ પેન્ડન્સીને ફગાવીને બુલડોઝર ચલાવવાની પોતાની જીદ પૂરી કરે છે કે પછી પ્રવીણ મકવાણાના આ કાનૂની દસ્તાવેજો સામે સરપંચે અને તાલુકાના અધિકારીઓએ પીછેહઠ કરવી પડે છે. નવા રતનપર ગામનું આ દબાણ પ્રકરણ હવે માત્ર એક સામાન્ય ડિમોલિશન મટીને સરપંચ અને સદસ્ય વચ્ચેની પ્રતિષ્ઠાની જંગ અને કાનૂની યુદ્ધમાં ફેરવાઈ ગયું છે. આ હાઈવોલ્ટેજ ડ્રામાની પળેપળની અપડેટ “ધ ગ્રેટ વર્લ્ડ” ન્યૂઝ વેબસાઈટ પર લાઈવ જોતા રહો.