ધ ગ્રેટ વર્લ્ડ, મુંબઈ, ૨ જૂન:
બોલીવુડના મહાનાયક અમિતાભ બચ્ચને તાજેતરમાં જ સોશિયલ મીડિયા પર ચાલી રહેલી તેમના ખરાબ સ્વાસ્થ્ય અને હોસ્પિટલમાં દાખલ થવાની તમામ અફવાઓ પર પૂર્ણવિરામ મૂકી દીધું છે. ૮૩ વર્ષની ઉંમરે પણ અદભુત ઉર્જા ધરાવતા બિગ બીએ તેમના સત્તાવાર બ્લોગ અને સોશિયલ મીડિયા હેન્ડલ પર સેટ પરથી કેટલીક તસવીરો શેર કરીને ચાહકોને કામ પર વાપસીના ખુશખબર આપ્યા છે. તેમણે પોતાની આગવી શૈલીમાં લખ્યું કે, દિનચર્યામાં પાછા ફરવા અને અધૂરા કામો પૂરા કરવા માટે આ એક શ્રેષ્ઠ દિવસ છે.
અહેવાલો અનુસાર, થોડા દિવસો પહેલા મુંબઈની નાનાવટી હોસ્પિટલમાં તેઓ માત્ર એક રૂટિન મેડિકલ ચેક-અપ માટે ગયા હતા, પરંતુ સોશિયલ મીડિયા પર તેને લઈને ખોટા અહેવાલો વહેતા થયા હતા. બિગ બીએ તેમના બ્લોગ પર તુલસીદાસજીની ચોપાઈ “મંગલ ભવન અમંગલ હારી” લખીને પોતાના શૂટિંગ શિડ્યુલની ઝલક આપી હતી. તેમણે ઉમેર્યું કે, કામ કરવું એ જ તેમના માટે સર્વોચ્ચ સન્માન અને આત્મગૌરવ છે. આ સમાચાર સાંભળીને દુનિયાભરના કરોડો ચાહકોએ રાહતનો શ્વાસ લીધો છે
