સત્તાના સિંહાસન માટે સંભવિત નામોની યાદી તૈયાર: જ્ઞાતિગત સમીકરણો અને અનુભવ વચ્ચે રસાકસી
ભાવનગર મહાનગરપાલિકાના નવા સુકાનીની પસંદગી પ્રક્રિયા હવે અંતિમ તબક્કામાં પહોંચી છે. મેયર પદ ‘સામાન્ય મહિલા’ માટે અનામત હોવાથી અનેક મહિલા કોર્પોરેટરોએ પક્ષના મોવડીમંડળ સમક્ષ પોતાની દાવેદારી મજબૂત કરી છે. હાલના તબક્કે વર્ષાબા પરમારનું નામ સિનિયોરિટી અને વહીવટી અનુભવના આધારે સૌથી આગળ ચાલી રહ્યું છે.
જોકે, મેયરની રેસમાં વૈશાલીબાઈ કનૈયા, રીન્કુબેન માંગુકિયા અને અલ્પાબેન પટેલ જેવા યુવા અને સક્રિય ચહેરાઓ પણ જોરદાર ટક્કર આપી રહ્યા છે. બીજી તરફ, સ્ટેન્ડિંગ કમિટીના ચેરમેન પદ માટે યુવરાજસિંહ ગોહિલ અને અશોકભાઈ બારૈયાના નામ મોખરે છે. પક્ષના આંતરિક સૂત્રો મુજબ, આગામી ટર્મમાં શહેરના વિકાસકામોને ગતિ આપી શકે તેવા અને પ્રજામાં લોકપ્રિય હોય તેવા ચહેરા પર જ ‘આખરી મહોર’ મારવામાં આવશે.
ખાસ કરીને પૂર્વ અને પશ્ચિમ વિસ્તારના સંતુલનને જાળવી રાખવા માટે પક્ષ કોઈ નવો ‘માસ્ટર સ્ટ્રોક’ રમી શકે છે. હવે જોવાનું એ રહેશે કે ગાંધીનગરથી કયા નામ પર મંજૂરીની મહોર લાગે છે અને ભાવનગરના વિકાસની કમાન કોને સોંપવામાં આવે છે.
