ધ ગ્રેટ વર્લ્ડ, એનજામેના
મધ્ય આફ્રિકાના દેશ ચાડમાં આતંકવાદી સંગઠન બોકો હરામ દ્વારા કરવામાં આવેલા એક ઘાતકી હુમલામાં 23 સૈનિકોના મોત થયા છે અને અન્ય 26 ઘાયલ થયા છે. લેક ચાડ વિસ્તારમાં આવેલા બરકા તોલોરોમ ટાપુ પર સ્થિત એક સૈન્ય ચોકીને આતંકવાદીઓએ નિશાન બનાવી હતી. સોમવારે રાત્રે થયેલા આ હુમલામાં આતંકવાદીઓએ અત્યાધુનિક હથિયારોનો ઉપયોગ કર્યો હતો. ચાડની સેનાએ વળતી કાર્યવાહીમાં અનેક આતંકવાદીઓને મારી પાડ્યા હોવાનો દાવો કર્યો છે.
ચાડના રાષ્ટ્રપતિ મહામત ઇદ્રિસ ડેબી ઇટ્નોએ આ હુમલાને કાયરતાપૂર્ણ ગણાવીને આતંકવાદ સામેની લડાઈ ચાલુ રાખવાની શપથ લીધી છે. ઉલ્લેખનીય છે કે નાઈજીરીયા સ્થિત બોકો હરામ છેલ્લા એક દાયકાથી ચાડ, નાઈજર અને કેમેરૂનના સરહદી વિસ્તારોમાં સક્રિય છે. ઓક્ટોબર 2024 માં પણ આવા જ એક હુમલામાં 40 સૈનિકોના મોત થયા હતા. આ હુમલો સૂચવે છે કે આ પ્રદેશમાં આતંકવાદીઓ હજુ પણ મજબૂત છે અને પ્રાદેશિક સુરક્ષા દળો માટે મોટો પડકાર છે. સંયુક્ત રાષ્ટ્રે પણ આ હુમલાની નિંદા કરી છે અને આફ્રિકન દેશોને આતંકવાદ સામે એક થવા અપીલ કરી છે.
