ધ ગ્રેટ વર્લ્ડ, ગ્વાદર
પાકિસ્તાનના અશાંત ગણાતા બલૂચિસ્તાન પ્રાંતના વ્યૂહાત્મક બંદર ગ્વાદર (Gwadar) નજીક સુરક્ષા દળોના કાફલાને નિશાન બનાવીને એક ભયાનક આત્મઘાતી બોમ્બ બ્લાસ્ટ કરવામાં આવ્યો છે. સત્તાવાર લશ્કરી સૂત્રોના જણાવ્યા અનુસાર, સુરક્ષા દળોનું વાહન જ્યારે નિયમિત પેટ્રોલિંગ પર હતું, ત્યારે વિસ્ફોટકોથી ભરેલી એક કારે લશ્કરી વાહનને જોરદાર ટક્કર મારી હતી. આ પ્રચંડ વિસ્ફોટમાં ચાર પાકિસ્તાની સૈનિકો ઘટનાસ્થળે જ શહીદ થયા છે, જ્યારે અન્ય છ જવાનો ગંભીર રીતે ઈજાગ્રસ્ત થયા છે. વિસ્ફોટ એટલો શક્તિશાળી હતો કે આસપાસની ઇમારતોના કાચ પણ તૂટી ગયા હતા. પ્રતિબંધિત સંગઠન ‘બલૂચ લિબરેશન આર્મી’ (BLA) એ આ હુમલાની જવાબદારી સ્વીકારી છે. આ ઘટના બાદ પાકિસ્તાની સેના અને એન્ટી-ટેરરિસ્ટ સ્ક્વોડે સમગ્ર ગ્વાદર શહેર અને ચાઇના-પાકિસ્તાન ઇકોનોમિક કોરિડોર (CPEC) પ્રોજેક્ટની આસપાસના વિસ્તારોને કોર્ડન કરીને મોટું સર્ચ ઓપરેશન શરૂ કર્યું છે. હુમલાખોરોના અન્ય સાથીદારો સરહદ પાર ન નાસી જાય તે માટે તમામ એક્ઝિટ પોઈન્ટ્સ સીલ કરી દેવામાં આવ્યા છે.