સાંસદ નીમુબેન બામણિયા અને દિગ્ગજ નેતાઓની હાજરીમાં લક્ષ્મણભાઈ બારૈયાએ ગજવી સભાઓ; ભાજપના જવલંત વિજયનો આશાવાદ
ધ ગ્રેટ વર્લ્ડ, ભાવનગર
ભાવનગર જિલ્લા પંચાયતની ચોગઠ બેઠક પર ચૂંટણીનો જંગ હવે તેના ચરમસીમાએ પહોંચ્યો છે. ભારતીય જનતા પાર્ટીએ આ બેઠક અંકે કરવા માટે પોતાની પૂરી તાકાત ઝોંકી દીધી છે, જેમાં ખાસ કરીને અખિલ ભારતીય કોળી સમાજના અગ્રણી અને ભાવનગર તાલુકા ભાજપ બક્ષીપંચ મોરચાના પ્રમુખ લક્ષ્મણભાઈ બારૈયા એક નિર્ણાયક ભૂમિકામાં જોવા મળી રહ્યા છે. ચોગઠ જિલ્લા પંચાયતના ઉમેદવાર મુકેશભાઈ રાઠોડના સમર્થનમાં લક્ષ્મણભાઈ બારૈયા દ્વારા યોજાયેલી સભાઓ અને જનસંપર્ક અભિયાને વિરોધી છાવણીમાં ફફડાટ ફેલાવી દીધો છે.
દિગ્ગજ નેતાઓની હાજરી અને સંગઠન શક્તિ
તાજેતરમાં ચોગઠ ખાતે ઉમેદવાર મુકેશભાઈ રાઠોડના મધ્યસ્થ કાર્યાલયના ઉદ્ઘાટન પ્રસંગે લક્ષ્મણભાઈ બારૈયાની આગેવાનીમાં એક વિશાળ જનમેદની ઉમટી પડી હતી. આ પ્રસંગે ભાવનગરના સાંસદ નીમુબેન બામણિયા સહિતના દિગ્ગજ નેતાઓ સાથે લક્ષ્મણભાઈ ખભેખભા મિલાવીને પ્રચાર કાર્યમાં સક્રિય દેખાયા હતા. આ બેઠકમાં ભાવનગરના જાણીતા બિલ્ડર ભરતભાઈ વાઘેલા, ડૉ. એલ.બી. ગોહિલ સાહેબ, ઉદ્યોગપતિ નાગજીભાઈ (શેઠ) લંગાળા અને પાયાલાલ બારૈયા જેવા સમાજના મોભીઓ પણ લક્ષ્મણભાઈની સાથે જોડાયા હતા, જે દર્શાવે છે કે આ ચૂંટણીમાં કોળી સમાજ અને ભાજપનું સંગઠન અત્યંત મજબૂત છે.
લક્ષ્મણભાઈ બારૈયાની ‘વિજય હાકલ’
કોળી સમાજના અગ્રણી તરીકે લક્ષ્મણભાઈ બારૈયાએ સભાઓ ગજવતા સ્પષ્ટ શબ્દોમાં જણાવ્યું હતું કે, ચોગઠ બેઠક પર ભાજપનો વિજય એ માત્ર પક્ષનો નહીં પણ સમગ્ર સમાજના વિકાસનો વિજય છે. તેમણે ગામેગામ ફરીને છેવાડાના મતદારો સુધી પહોંચી ભાજપ સરકારની કામગીરી અને મુકેશભાઈ રાઠોડની સામાજિક નિષ્ઠાને લોકો સમક્ષ મૂકી છે. લક્ષ્મણભાઈની આક્રમક શૈલી અને લોકો સાથે જોડાવાની તેમની આવડતને કારણે ચોગઠ સીટ પર ભાજપનો જયજયકાર અત્યારથી જ દેખાઈ રહ્યો છે.
ચોગઠમાં ભાજપ તરફી લહેર
રાજકીય સમીક્ષકોનું માનવું છે કે, લક્ષ્મણભાઈ બારૈયા જેવા સંગઠિત નેતા જ્યારે મેદાનમાં હોય ત્યારે જ્ઞાતિગત સમીકરણો ભાજપની તરફેણમાં મજબૂત બને છે. સાંજે દિવ્યેશ સોલંકી (ભાઈ)ના આગમન પૂર્વે જ લક્ષ્મણભાઈએ ચોગઠમાં કેસરીયો માહોલ બનાવી દીધો છે. નીમુબેન બામણિયાની હાજરી અને લક્ષ્મણભાઈની સક્રિયતાએ સાબિત કરી દીધું છે કે ચોગઠ બેઠક પર ભાજપનો ભગવો લહેરાવવા માટે કાર્યકરો થનગની રહ્યા છે.
ચોગઠ વિસ્તારમાં લક્ષ્મણભાઈ બારૈયાના વધતા જનસમર્થનને જોતા લાગે છે કે આગામી સમયમાં વિરોધ પક્ષો માટે આ ગઢ ભેદવો અશક્ય બની રહેશે.
