ધ ગ્રેટ વર્લ્ડ, ભાવનગર
ભાવનગર રેડક્રોસ સોસાયટી દ્વારા આગામી ૮ મે, ૨૦૨૬ ને શુક્રવારના રોજ ‘વિશ્વ રેડક્રોસ દિવસ’ નિમિત્તે માનવતાના સેવા કાર્યોનું સુંદર આયોજન કરવામાં આવ્યું છે. ‘માનવતામાં એકતા’ થીમ પર આધારિત આ ઉજવણીના ભાગરૂપે દિવાનપરા રોડ પર આવેલા રેડક્રોસ ભવન ખાતે સવારથી સાંજ સુધી લોકજાગૃતિના અનેકવિધ કાર્યક્રમો યોજાશે, જેમાં જોડાવા માટે શહેરની ધર્મપ્રેમી જનતાને જાહેર નિમંત્રણ પાઠવવામાં આવ્યું છે.
કાર્યક્રમની વિગત અનુસાર, સવારે ૯:૦૦ થી રાત્રિના ૯:૦૦ વાગ્યા સુધી રેડક્રોસ બ્લડ બેન્ક ખાતે ભવ્ય રક્તદાન શિબિરનું આયોજન કરાયું છે. દિવસની શરૂઆતમાં સવારે ૧૦:૩૦ વાગ્યે ધ્વજ વંદન બાદ નિ:શુલ્ક મેડિકલ કેમ્પ અને ફિઝિયોથેરાપી સારવાર કેમ્પનો પ્રારંભ થશે. આ દિવસે ‘વિશ્વ થેલેસેમિયા દિવસ’ પણ હોવાથી ૧૮ થી ૨૫ વર્ષના અપરિણીત યુવક-યુવતીઓ માટે રાહત દરે થેલેસેમિયા તપાસ કેમ્પ રાખવામાં આવ્યો છે. આ ઉપરાંત, થેલેસીમિયા મેજરથી પીડાતા બાળકો માટે ચિત્ર સ્પર્ધાનું પણ વિશેષ આયોજન કરવામાં આવ્યું છે.
રેડક્રોસ ભાવનગર દ્વારા આ તમામ પવિત્ર માનવતાવાદી કાર્યોમાં સહભાગી બનવા અપીલ કરવામાં આવી છે. વધુ માહિતી માટે બાર્ટન લાઈબ્રેરીની સામે આવેલા રેડક્રોસ ભવનનો અથવા મોબાઈલ નંબર ૯૪૨૯૪૦૬૨૦૨ પર સંપર્ક કરી શકાશે. આ આયોજન દ્વારા ભાવનગરના નાગરિકોમાં આરોગ્ય અને સેવા પ્રત્યે નવી ચેતના જગાડવાનો પ્રયાસ કરવામાં આવ્યો છે.
