ધ ગ્રેટ વર્લ્ડ, નવી દિલ્હી
ભીષણ ગરમી અને લૂ (Heatwave) નો સામનો કરી રહેલા દિલ્હીવાસીઓ માટે આજની સવાર સુખદ રહી હતી. વહેલી સવારથી જ આકાશમાં કાળા વાદળો છવાયા હતા અને હળવા પવન સાથે ઝાપટાં પડતા તાપમાનમાં અચાનક 5 ડિગ્રી સેલ્સિયસનો ઘટાડો નોંધાયો હતો. સફદરજંગ હવામાન કેન્દ્રના જણાવ્યા મુજબ, મહત્તમ તાપમાન 34 ડિગ્રીની આસપાસ રહેશે, જે મે મહિનાના સરેરાશ તાપમાન કરતા ઓછું છે. જોકે, વરસાદને કારણે કેટલાક નીચાણવાળા વિસ્તારોમાં પાણી ભરાવાની સમસ્યા સર્જાઈ હતી, જેના લીધે સવારના સમયે ઓફિસ જનારા લોકોને ટ્રાફિકનો સામનો કરવો પડ્યો હતો. હવામાન વિભાગના મતે આ રાહત માત્ર બે-ત્રણ દિવસ પૂરતી રહેશે, ત્યારબાદ ફરીથી ગરમીનો પારો 40 ડિગ્રીને પાર કરી શકે છે.
