૭ ચારણા સહિત ૨૫ લાખથી વધુનો મુદ્દામાલ જપ્ત કરી ૭ શખ્સો સામે કાયદેસરની કાર્યવાહી હાથ ધરાઈ
ધ ગ્રેટ વર્લ્ડ, ભાવનગર
ભાવનગર તાલુકાના લાખણકા ગામમાં છેલ્લા લાંબા સમયથી મોટા પાયે ગેરકાયદેસર રીતે રેતી ખનન અને તેને ચાળવાની પ્રવૃત્તિ ચાલી રહી હોવાની વ્યાપક ફરિયાદો ઉઠી હતી. આ ફરિયાદોને ગંભીરતાથી લઈને ખાણ-ખનીજ વિભાગની ટીમે આજે વહેલી સવારે લાલ આંખ કરી હતી અને લાખણકા ગામે આકસ્મિક દરોડા પાડ્યા હતા. આ કાર્યવાહી દરમિયાન તંત્રએ અલગ-અલગ સાત જગ્યાએથી ૨૫ લાખથી વધુની કિંમતનો મુદ્દામાલ ઝડપી પાડ્યો છે.
વહેલી સવારે ત્રાટકી ખાણ-ખનીજની ટીમ
ભૂસ્તરશાસ્ત્રી બી.એમ. જાળોંધરાના માર્ગદર્શન હેઠળ ભૂસ્તરશાસ્ત્રી કચેરી ભાવનગરની તપાસ ટીમ દ્વારા આ ઓપરેશન પાર પાડવામાં આવ્યું હતું. તંત્રને બાતમી મળી હતી કે લાખણકા વિસ્તારમાં ખનીજ ચોરો દ્વારા નદીના પટ કે અન્ય વિસ્તારોમાંથી ગેરકાયદે રેતી કાઢી તેને મશીનરી દ્વારા ચાળવામાં આવે છે. આ બાતમીના આધારે વહેલી સવારે જ્યારે આ પ્રવૃત્તિ ચાલુ હતી ત્યારે જ તપાસ ટીમે અલગ-અલગ ૭ સ્થળોએ એકસાથે તપાસ હાથ ધરી હતી.
સાત શખ્સો સામે કાર્યવાહી અને મુદ્દામાલ જપ્ત
તપાસ દરમિયાન ઘટનાસ્થળેથી રેતી ચાળવા માટેના ૭ મોટા ચારણા અને અન્ય આનુષંગિક સામગ્રી મળી આવી હતી. આ ગેરકાયદે પ્રવૃત્તિમાં સંડોવાયેલા લાખણકા ગામના જ ૭ શખ્સોને પણ ઝડપી લેવામાં આવ્યા છે. ઝડપાયેલા શખ્સોના નામ નીચે મુજબ છે:
- રણછોડ બચુભાઈ ખસીયા
- મુના પ્રેમજીભાઈ ખસીયા
- અશ્વિન ભુપતભાઈ ખસીયા
- બીજલ હરજીભાઈ ખસીયા
- દીપક કાનજીભાઈ બારીયા
- ભોપા ખોડાભાઈ બારૈયા
- મુન્ના ધુસાભાઈ ચૌહાણ
આ તમામ શખ્સો ગેરકાયદેસર રીતે રેતી ખનન અને ચાળવાની પ્રવૃત્તિ કરતા રંગેહાથ ઝડપાયા હતા.
ખનીજ ચોરોમાં ફફડાટ
ખાણ-ખનીજ વિભાગે કુલ ૨૫ લાખનો મુદ્દામાલ સીઝ કરી તેને જીએમડીસી તગડી ખાતે અટકાવવામાં આવ્યો છે અને આ તમામ શખ્સો સામે આગળની કાયદેસરની કાર્યવાહી શરૂ કરી છે. ભાવનગર જિલ્લામાં ખનીજ ચોરો સામે તંત્રની આ સતત અને કડક કાર્યવાહીને પગલે ભૂમાફિયાઓમાં ભારે ફફડાટ ફેલાઈ ગયો છે. આગામી દિવસોમાં પણ આવી ગેરકાયદે પ્રવૃત્તિઓ રોકવા માટે વિભાગ દ્વારા કડક ચેકિંગ ચાલુ રાખવામાં આવશે તેવા સંકેતો મળી રહ્યા છે.
