ધ ગ્રેટ વર્લ્ડ, ભાવનગર
ગુજરાતમાં આગામી સ્થાનિક સ્વરાજ્યની ચૂંટણીઓનો માહોલ ગરમાયો છે, ત્યારે ભાવનગર જિલ્લામાં આ વખતે રાજકીય જંગ રસપ્રદ બનવા જઈ રહ્યો છે. અત્યાર સુધી ભાજપ, કોંગ્રેસ અને આમ આદમી પાર્ટી વચ્ચે ત્રિપાંખિયો જંગ જોવા મળતો હતો, પરંતુ હવે ‘વ્યવસ્થા પરિવર્તન પાર્ટી’ (VPP) એ પણ પોતાના મજબૂત ઉમેદવારો મેદાનમાં ઉતારીને મોટા ગજાના પક્ષોની ઉંઘ હરામ કરી દીધી છે. પાર્ટીએ ભલે સીમિત બેઠકો પર ઉમેદવારો રાખ્યા હોય, પરંતુ આ ઉમેદવારો સ્થાનિક સ્તરે ભારે વર્ચસ્વ ધરાવતા હોવાનું જણાઈ રહ્યું છે.
યુવા અને લડાયક ચહેરાઓને પ્રાધાન્ય
ભાવનગર જિલ્લા પંચાયત અને તાલુકા પંચાયતની બેઠકો માટે વ્યવસ્થા પરિવર્તન પાર્ટીએ ખાસ કરીને યુવા અને ભણેલા-ગણેલા ઉમેદવારો પર પસંદગી ઉતારી છે. કળસાર જિલ્લા પંચાયત બેઠક પરથી યુવા ઉમેદવાર કિશોરભાઈ નરશીભાઈ પરમારે ભારે સમર્થકો સાથે પોતાની ઉમેદવારી નોંધાવી છે. તેમની સાથે મોટી સંખ્યામાં કાર્યકર્તાઓ ઉમટી પડ્યા હતા, જે દર્શાવે છે કે ગ્રામ્ય સ્તરે પરિવર્તનની લહેર જોવા મળી રહી છે.
તેવી જ રીતે, ભાવનગરના અન્ય વિસ્તારોમાં પણ પક્ષે જમીની સ્તરના કાર્યકરોને ટિકિટ આપી છે. જેમાં ભાવેશભાઈ ડી. મકવાણા એ ભાવનગર કલેક્ટર કચેરી ખાતે વિધિવત ફોર્મ ભરી પોતાની દાવેદારી મજબૂત કરી છે. બોરતળાવ વોર્ડ નં. 9 માંથી પરેશભાઈ રાઠોડ મેદાનમાં છે, જેઓ ‘શિક્ષિત બનો, સંગઠિત બનો’ ના સૂત્ર સાથે મેદાનમાં ઉતર્યા છે. આ ઉપરાંત, બોટાદ નગરપાલિકા વિસ્તારમાં પણ વ્યવસ્થા પરિવર્તન પાર્ટી અને આમ આદમી પાર્ટી વચ્ચે ખરાખરીનો જંગ જોવા મળી રહ્યો છે, જ્યાં ચેતનભાઈ હર્ષદભાઈ ચૌહાણ જેવા ઉમેદવારો મતદારોને રીઝવવા પ્રયાસ કરી રહ્યા છે.
રાષ્ટ્રીય નેતૃત્વની હાજરી અને રણનીતિ
ઉમેદવારી ફોર્મ ભરતી વખતે વ્યવસ્થા પરિવર્તન પાર્ટીના રાષ્ટ્રીય અધ્યક્ષ ધરમશીભાઇ ઢાપા અને રાષ્ટ્રીય ખજાનચી રમેશભાઈ જેઠવા ખાસ ઉપસ્થિત રહ્યા હતા. પક્ષના નેતાઓની હાજરીએ કાર્યકરોમાં નવો જોશ ભર્યો છે. ઠેર-ઠેર યોજાયેલા રોડ-શો અને સભાઓમાં કાર્યકર્તાઓની બહોળી સંખ્યા જોઈને રાજકીય વિશ્લેષકો માની રહ્યા છે કે VPP આ વખતે અનેક બેઠકો પર નિર્ણાયક સાબિત થશે.
લોક માંગને માન આપી ચૂંટણી મેદાનમાં ઝંપલાવ્યું
પાર્ટીના રાષ્ટ્રીય ખજાનચી રમેશભાઈ જેઠવાએ ધ ગ્રેટ વર્લ્ડ સાથેની એક વાતચીતમાં એક મહત્વનું નિવેદન આપ્યું હતું. તેમણે જણાવ્યું કે,
”વાસ્તવમાં આ વખતની ચૂંટણીમાં અમારી પાર્ટી કોઈ ઉમેદવારો ઉભા નહીં રાખીને ‘ડ્રોપ’ લેવા માંગતી હતી. અમે સંગઠન મજબૂત કરવા પર ધ્યાન આપવા માંગતા હતા, પરંતુ વિવિધ વિસ્તારોમાંથી લોકોનો ભારે આગ્રહ અને લોક માંગણી ઉઠી હતી. જનતા ઈચ્છે છે કે તેમને ભાજપ કે કોંગ્રેસ સિવાયનો એક મજબૂત વિકલ્પ મળે. એટલે લોકોની લાગણીને માન આપીને અમે કેટલાક પસંદગીના વિસ્તારોમાં લડાયક ઉમેદવારોને મેદાનમાં ઉતાર્યા છે.”
શું પરિવર્તન આવશે?
વ્યવસ્થા પરિવર્તન પાર્ટીનું ચૂંટણી ચિન્હ ‘રોડ રોલર’ છે, જે જાણે પ્રસ્થાપિત પક્ષોના ગઢ તોડવા તૈયાર હોય તેમ લાગે છે. ભાવનગરની જનતા શિક્ષણ, આરોગ્ય અને ભ્રષ્ટાચાર મુક્ત શાસનના મુદ્દે આ વખતે કોના પર કળશ ઢોળશે તે જોવું રહ્યું. પરંતુ એટલું ચોક્કસ છે કે, કિશોરભાઈ પરમાર, ભાવેશભાઈ મકવાણા અને પરેશભાઈ રાઠોડ જેવા ઉમેદવારોએ પ્રચારમાં જોર પકડતા અત્યારે તો ચૂંટણીનો જંગ જામ્યો છે.
આગામી દિવસોમાં મતદાન થશે ત્યારે જ ખબર પડશે કે વ્યવસ્થા પરિવર્તન પાર્ટી કેટલી બેઠકો જીતે છે, પરંતુ હાલ પૂરતું તો તેમણે ભાવનગરના રાજકારણમાં પોતાની મજબૂત નોંધ લેવડાવી દીધી છે.
