કોંગ્રેસની ‘ભજીયા પાર્ટી’માં ભંગાણ: અનેક કાર્યકરો અને અગ્રણીઓ નારાજ થઈને ભાજપમાં જોડાયા, દિવ્યેશ સોલંકીની ઉપસ્થિતિમાં નવા રતનપર સીટના ઉમેદવાર જગદીશ બારૈયાનો પ્રચાર તેજ

નવારતનપર તાલુકા પંચાયત બેઠક પર ભાજપના ઉમેદવાર જગદીશ બારૈયાની પ્રચંડ લોકચાહના: વિકાસના કામો અને લોકસંપર્કથી વિરોધીઓના ગઢમાં ગાબડાં

​

​ધ ગ્રેટ વર્લ્ડ, ભાવનગર

​સ્થાનિક સ્વરાજ્યની ચૂંટણીનો જંગ જામ્યો છે ત્યારે નવારતનપર તાલુકા પંચાયત બેઠક પર રાજકીય સમીકરણો રાતોરાત બદલાઈ ગયા છે. ભાજપના ઉમેદવાર જગદીશ બારૈયાએ તેમના પૂર્વ સરપંચ તરીકેના શાસનકાળ દરમિયાન કરેલા અભૂતપૂર્વ વિકાસકામો અને હાલના જોરદાર લોકસંપર્ક અભિયાનને કારણે જીત તરફ મજબૂત કદમ વધાર્યા છે. બીજી તરફ, વિરોધ પક્ષ કોંગ્રેસમાં આંતરિક મતભેદો સપાટી પર આવતા ભાજપનું પલ્લું અચાનક ભારે થઈ ગયું છે.

​નવારતનપરની સિકલ બદલનાર ‘વિકાસ પુરુષ’

​જગદીશ બારૈયા જ્યારે નવા રતનપર ગામમાં સતત બે ટર્મ સુધી સરપંચ તરીકે કાર્યરત હતા, ત્યારે તેમણે ગામના સર્વાંગી વિકાસ માટે રાત-દિવસ એક કર્યા હતા. ગ્રામજનોના જણાવ્યા અનુસાર, જગદીશભાઈએ પોતાના કાર્યકાળ દરમિયાન રસ્તા, પાણી, ગટર લાઈન અને સ્ટ્રીટ લાઈટ જેવી પાયાની સુવિધાઓને છેવાડાના ઘર સુધી પહોંચાડીને ગામની આખી સિકલ બદલી નાખી હતી. તેમના દ્વારા કરવામાં આવેલા વિકાસના કાર્યો આજે પણ નજરે તરી આવે છે, જે તેમને આ ચૂંટણીમાં અન્ય ઉમેદવારો કરતા ઘણા આગળ રાખે છે.

​કોંગ્રેસની ભજીયા પાર્ટીમાં ભડકો અને ભંગાણ

​ગઈકાલે નવારતનપરમાં કોંગ્રેસ પક્ષ દ્વારા એક ‘ભજીયા પાર્ટી’નું આયોજન કરવામાં આવ્યું હતું, જેનો હેતુ મતદારો અને કાર્યકરોને રીઝવવાનો હતો. પરંતુ, આ કાર્યક્રમમાં કેટલીક બાબતોને લઈને આંતરિક મતભેદો સર્જાયા હતા. આ મતભેદોને કારણે કોંગ્રેસની વિચારધારામાં માનતા અનેક સ્થાનિક લોકો નારાજ થઈ ગયા હતા. સૂત્રોના જણાવ્યા અનુસાર, નારાજ થયેલા આ લોકો કોઈ પણ જાતના દેખાડા વગર ચૂપચાપ ત્યાંથી નીકળી ગયા હતા અને ભારતીય જનતા પાર્ટી સાથે કનેક્શન મેળવી લીધું હતું. મોટો વર્ગ ભાજપ તરફ વળતા રાતોરાત રાજકીય માહોલ ભાજપમય બની ગયો છે. બીજી તરફ હાથબ સીટ હોય કે નવારતનપર સીટ, કોંગ્રેસ પાસે લોકો સમક્ષ રજૂ કરી શકે એવું કોઈ મજબૂત માથું પણ નથી. કોંગ્રેસની સ્થિતિ છેલ્લા સ્ટેજમાં એવી છે કે લશ્કર ક્યાં લડી રહ્યું છે તેની કોઈને ખબર જ નથી. પક્ષમાં કોઈ એક અસરકારક અગ્રણી હોવા જોઈએ એની પક્ષને એટલે કે સ્થાનિક પક્ષની નેતાગીરીને ખબર જ નથી.

​દિવ્યેશ સોલંકીની આગેવાનીમાં ‘હોમ ટુ હોમ’ પ્રચાર

​આજે જગદીશ બારૈયાએ પોતાની પ્રચાર યાત્રાને વધુ વેગ આપ્યો હતો. તેમણે ‘હોમ ટુ હોમ’ અને ‘પર્સન ટુ પર્સન’ જઈને મતદારો સાથે સીધો સંવાદ સાધ્યો હતો. આ પ્રચાર યાત્રામાં ખાસ આકર્ષણનું કેન્દ્ર રાજ્ય મંત્રી પુરુષોત્તમ સોલંકીના પુત્ર અને તેમના પ્રતિનિધિ દિવ્યેશ સોલંકી રહ્યા હતા. દિવ્યેશ સોલંકીની હાજરીથી કાર્યકરોમાં નવો જોશ જોવા મળ્યો હતો. તેમની સાથે ગામના અનેક મહાનુભાવો, યુવા અગ્રણીઓ અને વિશાળ સંખ્યામાં કાર્યકરો જોડાયા હતા.

​લોકોનો એક જ સૂર: “અમે તમારી સાથે છીએ”

​પ્રચાર દરમિયાન લોકોનો અભૂતપૂર્વ પ્રતિસાદ મળી રહ્યો છે. પ્રચારમાં જોડાયેલા એક કાર્યકરે ઉત્સાહભેર જણાવ્યું કે, “જગદીશભાઈ જ્યાં પણ જાય છે ત્યાં લોકો તેમનું ઉમળકાભેર સ્વાગત કરે છે. વૃદ્ધો અને યુવાનો સામે ચાલીને કહે છે કે – ‘જગદીશભાઈ, તમે અમારા ગામ માટે જે કામો કર્યા છે તે અમે ક્યારેય ભૂલી શકીએ તેમ નથી, તમારે પ્રચારની કે ચિંતા કરવાની કોઈ જરૂર નથી, અમે બધા તમારી સાથે જ છીએ.'”

​આમ, એક તરફ જગદીશ બારૈયાના વિકાસના કામોની ચર્ચા અને બીજી તરફ કોંગ્રેસમાં પડેલું ગાબડું – આ બંને પરિબળોને જોતા રાજકીય વિશ્લેષકો માની રહ્યા છે કે નવારતનપર બેઠક પર ભાજપનો વિજય નિશ્ચિત જણાઈ રહ્યો છે.

જગદીશ બારૈયાએ કરેલા વિકાસના કામોની યાદીની એક નાનકડી ઝલક